Pumpululh chuih ruangah suimilam 100 chung raltuknak

Lian Chawn:

Pumpululh hi nihin vawleicung mi tam bik nih kan uarmi le a kan hiip biktu lentecelhnak phunkhat a si ti cu al awk um lo. Pumpululh chuih nih ramkhat le ramkhat ipehtlaihnak le ihawikomhnak zong a thawnter deuh lai ti i remdaihnak zong a chuahter deuh lai tiah ruah a si. Asinain bawlungchuih ruangin vawleicung tuanbia ah philh awk tha lo raktuknak zong a rak chuak bal ti zong tuanbia cahmai in hnawh khawh a si ve lo. Cucaah acheu nih pumpululh ral (Football war or soccer war) an timi pumpululh chuih ruangin a thomi suimilam 100 chung raltuknak kong cu tuanbia ah a taang lan. Pumpululh chuih ruangin ai semmi suimilam 100 chung raltuknak ah ral ai domi ram cu El Salvador le Honduras an si i hi raltuknak ruangah minung a thong leng an thih pinah minung thong tampi nih an innlo an rak chuahtaak.

1969 June 26—1970 ah tuah dingmi World Cup i tel khawhnak ah El Salvador le Honduras an i zuam dih in an ramhnih karlak ah buainak a chuak. Cu ai semmi ral meici ruangin minung tampi thihnak tiang a chuakmi raltuknak cu a chuak.

Hi raltuknak kong he pehtlai in a ruang an kherhlai tikah pumpululh chuih ruang pin ah— hi ram pahnih hi ram innpa an si ruang le miphun i thleidannak lungput, an ram sipuazi dirhmun zong hi hrelh awk tha loin ai telmi a si. El Salvador le Honduras hi ram innpa an si—Honduras ram hi El Salvador ram nakin a let nga in a kau deuh. El Salvador ram hi Honduras nakin a fa deuhmi ram a si ko nain milu ahcun El Salvador milu hi Honduras milu i an let hnih a si. Cucaah El Salvador minung tampi cu an ram pawcawmnak a har caah Honduras ram ah an pem. Cinthlaknak in an paw an i cawm. Ral an i tuk lio 1969 ah Honduras ram ah a ummi El Salvador milu sing thum hrawng an si i Honduras milu i cheunga cheukhat an si.

1960 ah Honduras cinthlaknak lei nih cinthlaknak lei an sipuazi ah an ram pem El Salvador pawl nih harnak tampi an pek hna an hmuh tikah thawl dingin upadi pakhat chuah dingah acozah sinah an rak hal. 1967 ah vawlei ngeihnak nawl upadi pakhat Honduras cozah nih an chuah. Cu upadi ning in Honduras ah a ummi El Salvador miphun i an leikuang le an cinthlaknak hmun tampi an sungh caah El Salvador miphun tam ngai an ram ah an rak kir than. Honduras pawl khuaruah le thil tuahmi ruangah El Salvador miphun tampi harnak an tong i an ramhnih karlak i pehtlaihnak ah i remlonak le lung i hmuh thiamlonak meici ai sem.

1969 June 8 ah hi ramhnih 1970 World Cup i tel khawh nakding ah a voikhatnak pumpululh (Play-off first leg) Honduras khualipi ah an chuih. Cu ahcun mizapi nih an tanhning daan a fak ngai. Cutan ah Honduras nih El Salvador cu 1:0 in an rak tei. Hi puai lioah puai zohtu zong an i vua. Puai dih bakah khuaruahhar in thil a cangmi pakhat cu El Salvador an sungh lungfah tuk le ngaihchiat celh lo ah El Salvador nungakno Emelia (Kum 18) amah le amah meithal in ai kap i a thi. Emelia nih amah le mah ai thahmi hi hruh bia rumro a si ti khawh a si nain hi lio i an ram hnih karlak i zuamcawhnak le i pehtlaihnak a chiat tuk lio a si caah Emelia cu El Salvador rampi nih miraltha pakhat ah an ruah i upatnaktu an pek. A ruak an thlah ni ah El Salvador mizapi a thongthong pinah an president le El Salvador pumpululh phu dihlak an i tel. Emelia ruakthlahnak kong cu TV zong in an ram pumpi ah an thlah.

          Emelia thih cu a lakka ah a cang lo. Mah ngaknu a thih ruangah El Salvador pumpululh phu an thinlung a thawng chinchin i 1969 June 15 World Cup tel khawhnak a voi hnihnak (play-off second leg) cu El Salvador ah an chuih. Hi tan ah, El Salvador nih Honduras cu 3:0 in an tei ve hna. Hi lioah cun puai hnih chuih ah kawl tam deuh kawltu nih tei thai timi phung a um rih lo caah voikhat veve an i tei tiin ai tluk ah an chiah i puaikhat a chuih nolh ding an si. Cu puaikhat chuih nolh ding cu anmah ram ah chuih veve ti loin Mexico-city ah Play-Off chuih ding an si. Play-off an chuih hin cun ai teimi paoh 1970 World Cup ah ai tel ding an si cang. 1969 June 26 ah Play-off cu an chuih ciammam i an thiamnak dihlak chuah in an i cil hnu—a caan zong an sauh hnu ah El Salvador nih 3:2 in an tei hna.

Puai a dih in Honduras ah a ummi El Salvador miphun nih diriam tuk le lawklei tukin an teinak lunglawmhnak an langhter tikah Honduras pawl nih an sungh celh lo le an ngaihchiat lungfah lung in an velh hna i miphun pakhat le pakhat karlak buainak nganpi a hung chuak. Honduras cozah nih thawng pakhat an hun thanhmi cu, “A kan buai hnawhmi El Salvador miphun velh le thawl ruangah cozah nih dan kan in tat hna lai lo—El Salvador miphun nih an temtuarnak ruangah cozah sinah sunghzatlak man hal khawh a si lai lo,” ti a si.

Honduras ram ah El Salvador miphun serhsat an tonmi ruangah a lung a fak i ai lungsi lomi El Salvador cozah nih Honduras cozah sinah ral i tuk dingin thawng an thanh. El Salvador minung phur vanlawng pawl ah pound 100 a ritmi bomb an thlaih i vanlawng in heh law tiah Honduras ram cu an thuat colh.  Honduras pawl cu an lung a mit, an i vei luklak kar ah Honduras khualipi pa 8 i zungpipa umnak vialte El Salvador pawl nih an lak dih manh. Honduras le El Salvador hi vawlei ralpi II lioah American nih raltuknak sakhaan ai chiahnak hmun an si caah ralpi II lio an hmanmi F4U vanlawng tampi a um. Cu ruangah hi ramhnih an i tuk tikah vanlawng lawngte an hmang.  F4U vanlawng pakhat hnu pakhat a tla. Hi raltuknak hi vawlei ralpi II lio i hmanmi vanlawng in a hnu bik i tuk thannak zong a si.

Nili cung bak cuti cun an i phomh hnu ah American ram pawl komhnak (OAS) nih an tlangtlak hna hnu— an then hna hnu—suimilam 100 chung an i tuk hnu ah an meithal an chiah, an vanlawng an dinhter. Ral an i tuknak hmun hi Honduras leikap ah a fah deuh caah Honduras pawl nih fak deuh an tuar i ralkap le ramchung mi 2100 tluk an thi. El Salvador lei ah ralkap he ramchung mi he 900 tluk an thi ve. Hi raltuk ruangah hi ram pahnih karlak ah kum saupi ipehtlaihnak tiang a cat.

1970 World Cup ah El Salvador ram an i tel. Asinain atu tiang hi ramhnih pumpululh an chuih paoh ah an i zuamning hmual a fak peng rih.