Nun Lio Nakin Thih Hnu man na ngei deuh cang

Minung pum sa/chungril (Organ) zuar le cawk hi biatak tein kan hnu kum tlawmte chungah a hung tam. Kan theih pah lengmang, Iphone, iPad le Mac tbk. cawk duh ruangah Kal te hna i zuar. Laimi hmanh nih Refugee ruah ah kan Kal kan i zuar, tiah an chim kan theih.

Chan thar technology a that tuk tikah Siizung le siiinn tamp nih minung kan pumsa/chungril tampi kha fawite in an thlen khawh i cu tin minung tampi nih an nun an peh cuahmah cang.

Cucu kan chungril/taksa  chung in Mit, Thluak, Thin le Lung, Kal le Cuar(vun) tbk. pawl kha an si i cucu mi tampi nih an hlut cuahmah ve fawn. Cu hna lakah, nihin i an chimning ah Norway hi cu bantuk Organ a hlu tambik an si. 2011 ah khan Norway minung 79% nih hlut ding in an duh, tiah TV2 nih a chim. Cu nih cun 2011 chung lawnglawng ah Norway ah minung 450 hrawng nunnak a rak khamh, an ti fawn.

Laimi chung zong in "Ka thih tikah ka pum chung i hman khawhmi kha a herhtu an um ahcun rak pe hna uh," tiah a hlumi an um cang.

Zeipaoh cawk khawh a si cang

Cu ti i mizaw/ pum tlamtling tampi nih cu bantuk pumsa thar an hngah i hlut in le cawk in an i thleng. Cu lio ah mi tampi cu hngak kho lo in an thi. USA lawnglawng ah cu bantuk Organ thar ngah khawhnak dingah a hngakmi minung 113 000 an um cang i micazin ning te in an hngak ko.

Cheukhat nih cun phaisa an i cawi riangmang le an hmai i a hngak vemi (cazin ning in tuan ah thlen a si dingmi) minung kha a umnak/cazin an cawk ve ai. Cu ti a si caah USA ah cun phaisa in zeipaoh kan cawk khawh an ti lengmang zong cu a si.

Tahchunhnak ah kan Lung pakhat hi US Dollar in 113666 man a si i Hnit pakhat ah Dollar 1300 hrawng a man.

Cu ti a man fah tuk tikah mithi ruak chung i hman khawhmi pawl kha an fir cang hna. Cucu kan hnu thla hrawng zongah Israel nih cu bantuk a firmi hna tampi an rak tlaih hna. Mah cu lawng a si rih lo, sifak ram cheukhat ah cun kha bantuk thil pawl an hlut tikah phaisa an rak pek hna (mirum nih) tikah a hnu deuhdeuh cun a zuar in an zuar cang hna. India, Brasil le Asia ram tampi ah hngakchia fir le thah i a tthami Organ pawl kha zuar an hmang, tiah bia a rak chuak.

An man cio van zoh hna uh.

Atang i hi AOMT nih minung pumsa i a man khomi an chimmi zat a si. India, Tuluk le USA ah a man kho bik. Cu zong cu cozah nih theihpimi a si lo i a thliin tuahmi a si, an ti. Europa zong ah cun atu hi biatak ngaiin i zuarh le cawk a si.    

1. Mit: 1525 Dollar hrawng
2. Kharuh + Ha he: 1100 D
3. Liang: 450 D
4. Lung: 113666 D
5. Thin: 150000 D
6. Kut/ban: 360 D
7. Thi (1/2 L) 280 D   
8. Pawpi: 470 D
9. Kal: 237333 D
10. Hnit: 1300 D
11. Cuar/vun: 150 D (Original a man an khiahmi cu hika ah hin zoh khawh a si.)

A cung ka chim cang bang, hi bantuk chungril/pumsa zuar hi phung a um lo. Cozah nih a onhmi a si lo. Asinain cu cucu hrial khawh a si lo caah a thli in tuah a si. Nitlak ram le a hleiin Norway nih mah hi an kham. Ram chung ah cun an kham ko nain ram dang ah va kal in va cawk le vai i thlen kha an onh.