• • Pu Vum Tu Maung cu Mindat pengmi Pu Thang Pet le Pi Nauk nih April, 1900 kum Vuntu khua ah an hrin. Tangsarih tiang ca a cawng i 1917 kum ah Mirang ralkap a tla.Raldoh le lentecelh a thiam ngaimi a si. Ralkap a tuan lio ah Bo hnih a hmuh. Mah caan cu Kawlram hi Mirang nih an rak uk cang i Kawlmi le Laimi cu Mirang nih an rak serhsat, nautat hlei ah ramchung chuakmi thil òha vialte cu an ram ah an kuat dih i an duh ti lomi a hleivuang lawng kha an rak pek tawn hna.
Rakhine phungki U Oktamah cu Mirang uknak phung a duh lotu upa minthang pakhat a rak si. U Oktamah nih, “Kawlram chung i a ummi Mirang vialte hi kan dawi dih hna ahcun a òha lai.” tiah Mandalay ah a rak chim. A chimmi bia cu Pu Vum Tu Maung nih a rak theih ve tikah a lung a suk ngai. Kan ram le kan miphun caah a herhmi kha a lung a pem i 1924 December 25 ah ralkap in aa phuak i Lairam ah a tlung.
1925 Khua a phak cangka tein an khua ah sianginn a serpiak hna i amah nih saya zong a òuan. Saya a òuan pah cun Mirang uknak a that lonak le an kan nautatnak kong kha zapi sinah a chim lengmang. 1933 March 23-24 ah Laimi Rualremnak Bu an rak tuah i hruaitu ah amah an rak thim. 1934 ah Dohbama Asi Ayone upa le Kawlram humhaktu ralkap GCBA ah a rak lut. Mindat peng, Yaw tiva pawng Wa-re khua ah mi zapi pumhnak a rak tuahpi hna i biachahnak phun 9 an rak tuah i Mangwe Mangki Mr. Cracken sinah an rak kuat. Asinain Mr.Cracken nih an ca cu a cohlan lo caah minung 900 renglo an rak au. Cuti an au ruangah 1939 February 20 ah Pu Vum Tu Maung le a hawile minung 8 cu Mirang nih an tlaih hna i Hakha, Falam, Tiddim thong ah an thlak hna.
Cu hnu cun Mandaly, Minchian le Katha muipadup thong ah thla thum an thlak òhan hna. 1942 May ah Japan nih Katha thong cu bom an rak thlak i mi 55 an thi i thonginn vampang zong a rawh caah an zam kho òhan. Mirang pawl an thin a phawh tuk tikah Pu Vum Tu Maung a tlai khotu 5000 le a ruak in a rak chuahpi khotu 1000 laksawng kan in pek hna lai tiah an rak thanh. A inn zong mei an rak duah piak.
1945 August ah Naythurain meòing le 1946 ah Shwedagone pura hmai i Pa Sa Pa La Nyilakhan ah an phu ai awh in a kai. 1947 May ah Kawlram uknak phunglam ser dingah Bogyoke Aung San nih Pu Vum Tu Maung, Pu Mang Tung Nung, Pu Sa Vut, Pu Ngun To le Pu Thawng Cin Thang hna cu Laimi aiawhtu upa in an rak auh hna.
Laimi lakah Vuanci hmasabik a si i 1948 in 1951 tiang Lairam vuanci a òuan. Chin Ministry Affairs nih 1950 kum ah Lai Phunpi Ni (Chin National Day) cu February 20 ah tuah dingin an rak khiah. 1952 in 1966 tiang Vumtu khua ah dai tein khua a sa. 1966 February 20 kum Mindat ah an tuahmi a voi 18nk Laimi Phun Ni a hmang. Kualei a kir pah Vumtu pawngah motor cu ai let i 1966 February 23 ah a nunnak a liam.
Pu Vum Tu Maung cu Mirangral doh le Lai Phunpi Ni kan ngeih khawhnak dingah ruahnak le thanzaang a rak chuah lawng si loin kan Laimiphun a dawtu le kan ram zawn a ruattu bik pakhat a si caah harnak a phunphun a rak ing. Cucaah amah philh lonak caah Hakha cerhmun cu “Vum Tu Maung Cerhmun” tiah min an bunh.
A Khawmtu: Van Lian Hup & Sang Za Thang
